I Jornadas GALIZAleak: IndarRAP e Garcia MC

garcia-mc-abaixo-e-de-pe-600x600        indarrap

Lá onde os galegos vamos, levamos sempre a(s) música(s) connosco. Músicas que dizem, que significam, que comovem… As I Jornadas GALIZAleak nom iam ser umha excepçom, jaora, e portanto nom admira que umha das atividades estelares que aparecem no programa seja um concerto no qual teremos a oportunidade de desfrutar do melhor hip-hop basco (da mão de IndarRAP) e galego (com Garcia MC).

O QUE? Concerto de hip-hop com IndarRAP (Euskal Herria) e Garcia MC (Galiza)

QUANDO? 29 de maio (sexta-feira)

ONDE? 7 Katu Gaztetxea (Solokoetxeko Eskailerak, Bilbo). Vê o mapa aqui

A QUE HORAS? Às 21:30

PREÇO? De balde!

E QUEM SOM ELES? O grupo gasteiztarra IndarRAP, formado por El Puto Tito, Fat Fish e DJ Borda, é um dos mais salientáveis do movimento hip-hop em Euskal Herria. Trabalhos como Sin perder el norte (2010), La músika no es un negozio (2012) ou o mais recente La tapadera (2014) falam-nos de umha banda muito afastada do rap mais comercial e com umhas letras combativas e de apelo à luita revolucionária, tal e como podeis comprovar aqui mesmo.

Quanto a Garcia MC, bem conhecido do público galego por ter feito parte do coletivo de hip-hop Dios Ke Te Crew (autênticos pioneiros deste género musical no nosso país), partilha com IndarRAP a ideia do hip-hop como veículo de reivindicaçom social e de luita anticapitalista. Um magnífico exemplo disto é o seu recente trabalho Abaixo e de pé (2013), que podeis ouvir na íntegra aqui e onde o músico de Ordes se aproxima da realidade social e política de Chiapas e do movimento zapatista.

Advertisements
Publicado en ACTIVIDADES, Uncategorized | Etiquetado , , , , , | Deixar un comentario

I Jornadas GALIZAleak: Séchu Sende e Txerra Rodríguez

sechu_sende-txerra_rodriguez
Começa a contagem regressiva para as I Jornadas GALIZAleak, cujo programa (completinho e variado) já tivemos ocasiom de vos apresentar neste mesmo blogue há uns dias. Ora bem, para encorajar-vos mais ainda a assistir a este evento, iremos contando-vos um bocadinho mais em profundidade em que consistirá cada umha das atividades que decorrerám em Bilbo em 29 e 30 de maio próximos.

E começamos com as duas pessoas que darám o pistolaço de saída destas jornadas. De resto, dous autênticos convidados de luxo que mal precisam de ser apresentados e que nos últimos anos tenhem feito muita cousa para a cultura basca e a galega se conhecerem melhor: estamos a falar do padronês Séchu Sende e do deriotarra Txerra Rodríguez, que darám começo a dous dias de festa galega na capital de Biscaia com umha palestra de temática sociolinguística.

O QUE? Hizkuntz(ar)en bidezidorretan / Nos atalhos da(s) línguas (palestra), com Séchu Sende e Txerra Rodríguez

QUANDO? 29 de maio (sexta-feira)

ONDE? Kafe Antzokia (Done Bikendi Kalea, 2 – Bilbo). Vê o mapa aqui

A QUE HORAS? Às 12:00

PREÇO? De balde!

E QUEM SOM ELES? De Séchu Sende pouco vos podemos dizer que já nom saibades. Autor de um dos livros melhor sucedidos da literatura galega contemporánea, Made in Galiza (2007), cuja versom ao éuscaro foi realizada precisamente por Txerra Rodríguez e publicada em Txalaparta, Séchu vem de apresentar o seu livro mais recente, A República das Palavras, no qual reafirma o seu compromisso com umha determinada visom da língua e da cultura galegas. Séchu é, de resto, um dos melhores conhecedores da realidade social, política e linguística do Curdistám (assim o demonstrou em Viagem ao Curdistám para apanhar estrelas, 2012), e o seu trabalho a prol da presença do galego no ensino fica claro quando nos aproximamos das atividades que realiza com o seu alunado no IES Marco do Camballón (As Cruzes) ou do seu envolvimento nesse projeto tam fermoso como imprescindível que som as escolas de ensino galego Semente. Para saberdes mais sobre Séchu, sempre podedes premir aqui mesmo ou até ouvir esta entrevista que lhe figérom os nossos amigos do programa Tropa de Breoghan de Hala Bedi Irratia.

Quanto a Txerra Rodríguez, é sem dúvida um dos elos mais fortes que vinculam a Galiza com Euskal Herria nos nossos dias, sobretudo polo seu trabalho como tradutor (as obras Made in Galiza O caçador de bruxas, de Séchu Sende, estám disponíveis em éuscaro graças a ele), mas nom só. Sociolinguista, trabalha na cooperativa Emun como técnico de éuscaro em empresas privadas e, para além disso, gere o interessantíssimo blogue Garaigoikoa, de leitura muito recomendada.

Publicado en ACTIVIDADES, Uncategorized | Etiquetado , , , , | 1 comentario

O Festival de Cans desembarca na Universidade de Deusto

cans

A Cátedra de Estudos Galegos da Universidade de Deusto traerá a vindeira semana un anaco do Festival de Cans ao campus bilbaíno. Será da man de Alfonso Pato, director do festival que conseguiu converterse nunha das citas incontornábeis do maio cultural galego desde practicamente o seu nacemento, vai xa para doce anos. Con Alfonso Pato coñeceremos mellor a evolución deste evento, e mesmo teremos ocasión de visionar o making of dunha das últimas edicións e algunhas das curtametraxes gañadoras.

A actividade decorrerá na próxima cuarta feira (mércores), 27 de maio, a partir das 19:00 na Sala Gárate da Universidade de Deusto. E, até daquela, deixámosvos este petisco audiovisual onde podedes ver e escoitar Kepa Junkera a animar unha das últimas edicións do Festival de Cans. Que vos preste!

Publicado en ACTIVIDADES | Etiquetado , , , , | Deixar un comentario

Celebración das Letras Galegas en Vitoria-Gasteiz

letras gallicianas

Unha data incontornábel no calendario anual dos centros de estudos galegos en Euskal Herria é, con certeza, o Día das Letras Galegas. Vimos de coñecer precisamente as actividades que, co gallo desta conmemoración, ten programadas o Centro de Estudos Galegos da UPV/EHU, e que decorrerán a 11 de maio próximo (luns / segunda-feira) no Salón de Graos da Faculdade de Letras.

Os actos darán comezo ás 13:30 coa palestra “Luces e sombras de Xosé Filgueira Valverde”, ministrada por Paulo Martínez Lema (Universidade de Lisboa), quen comentará as diversas facetas da figura cuxa escolla para a presente edición das Letras Galegas ten xerado fortes controversias na cultura galega. Logo a seguir, o músico Anxo Pintos (que non precisa apresentación, como sabedes) protagonizará, a partir das 14:00, a conferencia musicada titulada “A zanfona. Unha viaxe de 1000 anos”. Sen dúbida, unha excelente oportunidade de coñecer o funcionamento, técnica e repertorio dun instrumento que nos retrotrae aos tempos medievais, e de man do que é, na actualidade, un dos seus mellores intérpretes. Boa ocasión tamén para lembrarmos unha das máis sobranceiras achegas de Filgueira Valverde ao eido da cultura galega: a súa edición do Cancionero Musical de Galicia de Casto Sampedro.

Publicado en ACTIVIDADES | Etiquetado , , , , , , | Deixar un comentario

Palestras, música, cabaré, conta-contos… nas I Jornadas GALIZAleak em Bilbo

11201412_10153332420559525_755904324_o (1)

Há uns meses, no decurso de um jantar no bairro de Masustegi, um grupúsculo de galegos/as (de nascença e de querença, pois tanto faz; os galegos nascemos onde queremos!) dérom os primeiros passos para criarem umha associaçom cujo nome já tinha sido sonhado tempo atrás por um deles: GALIZAleak. Como explica um dos seus fundadores, Paulo Padin, na entrevista que lhe realizárom os amigos do programa Tropa de Breoghan (e que podeis escuitar aqui mesmo), o propósito com que surgiu esta associaçom é bem simples (ou se calhar nem tanto…): contribuir para que as boas gentes de Euskal Herria tenham umha visom da Galiza, da sua cultura e das suas gentes afastada dos tópicos habituais sobre o nosso país. Porque a Galiza é muito mais do que mariscadas, cabaços e peregrinos, com certeza. E é bom que se saiba!

Mesmo tratando-se de umha associaçom jovem, GALIZAleak nom deixa de crescer, e cada vez consegue envolver mais gente nos seus projetos. Sem dúvida, o mais ambicioso até o de agora som as I Jornadas GALIZAleak / Galizako Jardunaldiak, que decorrerám em Bilbo a 29 e 30 de maio próximos. E dizemos “ambicioso” nom apenas pola quantidade e diversidade de atividades programadas para esses dous dias (com música, palestras e comida do país), mas também pola presença de colaboradores de luxo como Txerra Rodríguez, Séchu Sende ou Garcia MC, entre outros/as.

Eis o programa completo do evento:

Sexta-feira (venres), 29 de maio

– 12:00 h., Kafe Antzokia. Hitzaldia / Conferência: Hizkuntz(ar)en bidezidorretan (Nos atalhos da(s) língua(s)), com Séchu Sende e Txerra Rodríguez.

– 19:00 h., Zirika Herri Gunea. Hitzaldia / Conferência: Los procesos represivos en Galiza, ministrada por um militante de CEIVAR (Organismo Popular Anti-repressivo).

– 20:30 h. Kalejira (saída desde Zirkia Herri Gunea).

– 21:30 h. 7Katu. Kontzertua / Concerto: IndarRAP (Gasteiz) e Garcia MC (Galiza).

 Sábado, 30 de maio

– 12:00 h., Zirika Herri Gunea. Ipuin kontalariak / Conta-contos: Contos de animalario, com a Compañía Daboapipa.

– 13:00 h., Zirika Herri Gunea. Hitzaldia / Conferência: Outras experiências na emigração galega, ministrada por Anxo Baranga (LudoteGa) e Sílvia Pons (Asemblea Cultural Galega de Barcelona).

– 14:30 h., Zirika Herri Gunea. Herri bazkaria / Comida popular + Cabaré: Historias de vida, guerra, amor e case morte, com a Compañía Daboapipa. Preço: 7 € (inscriçom prévia no telefone 652 046 070).

Publicado en ACTIVIDADES | Etiquetado , , | 2 Comentarios

Os lectorados de Deusto e Gasteiz achégannos ao galego do Bierzo

11149423_852738238130094_992549542971159817_n

O chamado “galego exterior” ou “galego estremeiro” é, sen dúbida, un gran descoñecido fóra de Galiza. Mesmo aquí, en Euskal Herria, son moitas as persoas que teñen escoitado que a nosa lingua se prolonga cara ao sul, alén do río Miño, mais son xa bastantes menos as que saben que tamén o fai cara ao leste da actual comunidade autónoma galega, sendo lingua propria do oeste de Asturias e de Zamora e, por suposto, das áreas occidentais da comarca (administrativamente leonesa) do Bierzo. E é esta última zona (o Bierzo) a que nos interesa neste caso, pois centrará a interesante actividade que os lectorados de estudos galegos da Universidade de Deusto e da Universidade do País Vasco (coa colaboración da Cátedra UNESCO e mais da Fundación Azkue) nos oferecen para a semana próxima.

Co título de “O ensino bilingüe da lingua galega no Bierzo: outras prácticas de ensino”, Rafael Adán, membro da Asociación Berciana da Lingua Xarmenta (unha das máis activas na defensa e promoción do noso idioma nesa bisbarra leonesa) ministrará un pequeno seminario que lle servirá para partillar as experiencias educativas que están a ser implementadas nun territorio onde o galego, mesmo sendo lingua propria e contando cun número importante de falantes, non goza dun estatuto de oficialidade comparábel ao que ten na veciña Galiza. O seminario decorrerá a 28 de abril (terza feira) na sala 153 da Faculdade de Ciencias Sociais e Humanas da Universidade de Deusto (Bilbo), a partir das 16:00, e a 29 de abril (cuarta feira) na sala 0.16 da Faculdade de Letras da UPV/EHU (Vitoria-Gasteiz), ás 11:00. En ambos os dous casos, a entrada á actividade será libre e de balde.

E para irdes afacendo o ouvido ao xeito de falar dos irmáns bercianos, velaquí vos deixamos este capítulo do programa Ben falado! da TVG dedicado, precisamente, ao galego do Bierzo e ás suas particularidades.

Publicado en ACTIVIDADES | Etiquetado , , , , , , | Deixar un comentario

“Vikingland”, de Xurxo Chirro, na Faculdade de Letras de Vitoria-Gasteiz

Ciclo de cine 2015

Máis un ano (e xa van oito), o colectivo de profesores leitores da UPV/EHU organiza o ciclo de cinema Un mundo muchas miradas / Mundu bat begirada anitz, que decorrerá entre os días 21 e 24 deste mes de abril. Como xa é costume, a actividade combinará a proxección de pezas cinematográficas coa degustación de especialidades gastronómicas típicas das diferentes culturas cuxas linguas están representadas na Faculdade de Letras da universidade pública vasca (a galega, a alemá, a rusa, a italiana e a francesa).

No tocante a Galiza, o filme escollido para esta edición foi Vikingland (2011), de Xurxo Chirro, que se proxectará o mércores (cuarta-feira) 22 de abril ás 11:00 no Salón de Graos da Faculdade de Letras. Como moitos de vós xa saberedes, Vikingland é unha longametraxe documental baseada nas gravacións caseiras con que un mariñeiro galego (Luís Lomba “O Haia”) retratou o seu día a día como traballador emigrado no mar do Norte. Como o proprio Xurxo Chirro asinala, o propósito deste peculiar proxecto era “evitar que o tempo siga minando a memoria milagrosamente insertada na fraxilidade dos soportes audiovisuais”.

Logo a seguir á proxección da fita, o realizador Seném Outeiro (por sinal, un dos produtores do filme e autor da súa trilla sonora) partillará co público asistente algunhas cuestións relativas á mesma. A sesión concluirá por volta das 13:00 h., cunha degustación gratuíta de produtos gastronómicos galegos e alemáns que con certeza servirá para prolongar o debate sobre o filme.

Publicado en ACTIVIDADES | Etiquetado , , , , | Deixar un comentario